Бурхн Багшин Алтн сүмиг әрүслһнә шаҗна...

Эндр Элстин цутхлнг хурлд Бурхн Багшин Алтн сүм әрүслһнә шажна ик мөргүл эклв. Сүл кесг жилд иим авьяс мана танһчд күцәгдәд уга. Европд хамгин ик болн ке-сәәхн хурл түрүн болж әрүслгджәнә. Энүнә төлә Гьюдмед хурлын ламнрин келсәр, Рабне нертә байрин күцц мөргүл һурвн өдр күцәх. Энүнә йовудт Ямндаһ Бурхна маань умшгдх, һал тәәлһнә шажна үүлдвр күцәгдх, Догшн харсачнрин Бурхдын тәрн умшгдхмн. Хурл әрүслһнә төлә Гьюдмед хурлын гелнгүд Ямндаһ Бурхна мандл тосхв, тосна көшә кеж белдв. Цуг эн тоот болн Элстин цутхлнг хурлд бәәх бурхдын көшә, олн-зүсн шүтән, зургуд әрүслгдх. Буддийск шажна ик мөргүлиг күндтә Еше Лодой Ринпоче болн Хальмгин шажн лам Тэло Тулку Ринпоче һарджана.