《衝上雲霄II》衝入感情禁區 Sam哥年希愛恨糾纏 美儀對剪接有微言

無綫重頭劇《衝上雲霄II》終於踏入結局篇，喺呢個禮拜嘅劇情會交代大家嘅感情，最令大家回味嘅，梗係Sam哥（吳鎮宇）同何年希（陳法拉）呢段感情，睇見Sam哥拍拖嗰個萌樣，真係體會到愛情嘅魔力係幾厲害！Sam哥仲會喺呢個禮拜公開年希嘅女友地位，原來係因為飾演BJ嘅張國強出現。 BJ同Manna（米雪）因為各有家庭，過往只係維持住好朋友嘅關係，不過喺每年嘅2月28日都會約定見面，BJ考核完年希嘅機師考試後宣佈退休，佢希望同Manna去另一個地方享受佢哋嘅新生活，所以臨行前約咗Sam哥同年希見面， Manna送咗守護天使畀年希，希望可以守護佢哋呢份感情，亦都想Sam哥好好照顧佢，唔知係咪俾佢哋感動到，所以Sam哥終於喺大家面前承認同年希拍緊拖。但係Sam哥同年希成日為啲小問題而嗌交，而且Cool魔又死心不息纏住年希，搞到呢段三角關係更加複雜。 喬祖思最後心願 喬祖思（傅嘉莉）喺生命倒數嘅前夕，搵咗Issac（吳卓羲）影婚紗相，當人生最後一件想做嘅事，但係原來喬祖思一早知道Issac最愛係夏晨（胡杏兒），所以專登安排呢個誤會，最終Issac同夏晨都可以喺埋一齊。詹子麟（羅仲謙）同CoCo（胡定欣）亦都喺BB出世後喺埋一齊。 呢套劇嘅結局篇安排周五晚上連續播映兩個鐘，之後星期日嘅結局仲會移師去將軍澳新都城二期齊齊睇結局，但係聽講始終事出突然，唔少演員都有工作在身，所以?家大家都好努力度期，希望有一個完美嘅結局！對於張智霖不滿在《衝II》中的角色被刪剪得肢離破碎，陳法拉說：「唔清楚，只有演員先知自己角色嘅情況，相信佢哋將啲片會專業決定係剪定留。」她亦不認同外界覺得顧夏陽角色煩厭，更大讚他有型。 此外，昨日有讀者報料，指周五播放嘅《衝II》，一幕講述吳鎮宇訓斥陳法拉喺駕飛機時拿取飲品，但第一輯嗰陣，Sam哥都喺駕駛艙度攞陳慧珊遞畀佢杯嘢飲，話劇情前後矛盾。