Фарғонада шифокорлар Президент кўрсатмасига зид равишда кўча тозалашга олиб чиқилди

Ўзбекистон президентининг соғлиқни сақлаш ва таълим соҳаси ходимларини ободонлаштириш ишларига жалб этишни қатъий тақиқлаш ҳақидаги кўрсатмасига қарамай, Фарғонанинг Қувасой шаҳрида шифокорлар кўча тозалашга жалб этилгани маълум бўлди. Қувасой шаҳар Тиббиёт бирлашмасининг исми сир қолишини истаган ходими Озодликка врач ва хамширалар кўча тозалаш ишларига олиб чиқилгани сабаб, шифохона ва поликлиникада беморлар навбат кутиб қолишганини айтди. Шунингдек, Озодлик Фарғона вилоятининг бошқа туман ва шаҳрларида ҳам шифкорлар ва таълим соҳаси ходимлари ҳамда талабалар “ҳашар” деб аталаётган кўча тозалаш ишига жалб этилганини аниқлади. Қувасой шаҳар Тиббиёт бирлашмасининг Озодлик суҳбатлашган бир неча ходими шаҳар ҳокимининг оғзаки буйруғи билан ҳар жума ободонлаштириш ишларига мажбурланаётганликларини тасдиқлади. - Президентимиз Шавкат Мирзиёевнинг ўкитувчи ва тиббиёт ходимлари, талабаларни мажбурий мехнатга олиб чиқиш ҳакида танқидий сўзларини инобатга олмаган Қувасой шаҳар ҳокими Адҳам Зиёвутдинов тиббиёт бирлашмаси врач ва ҳамшираларини кўча тозалаш ишларига олиб чиқиб ишлатмоқда, - деди бирлашманинг исми сир қолиши шарти билан Озодликка гапирган ходими.