Гиви Смыр ицәыргақәҵа_10.02.2015

Асахьаҭыхҩы, Аҧсны Афырхаҵа Гиви Смыр иҟазара Аҧсны еиҧш уи анҭыҵгьы ибзианы еицырдыруеит. Иҳаҩсыз ашықәсазы уи иусумҭақәа рцәыргақәҵа мҩаҧысит Нальчик, «Адыгақәа рымшныҳәа» аҳәаақәа ирҭагӡаны. Акрааҵуеит Аҧснытәи аҟазара абзиабаҩцәагьы уи иусумҭақәа ирзыҧшиижьҭеи. Иахьа, Аҟәатәи Ацәыргақәҵатә зал хада иаҭааз зегьы ирыман алшара асахьаҭыхҩы уаанӡа иаҧиҵахьаз иара убас иусумҭа ҿыцқәагьы рбара. Ҩажәа шықәса инареиҳауп асахьаҭыхҩы – аскульптор Гиви Смыр иусумҭақәа ахәаҧшыҩцәа ирыдимгалеижьҭеи. Иахьатәи ацәыргақәҵа ҳамҭа бзиахеит аҟазара абзиабаҩцәа рзы. Ҩынҩажәа усумҭа инареиҳауп, еиуеиҧшым техникала инагӡоу. Урҭ тематикала удыршанхоит. Асахьаҭыхыҩ даҽа дунеик дазааигәоуп убри азакәхап иусумҭақәа рҿы амифологиа аҟынтә иаадыруа, ажәытәра иагахьоу ахаҿсахьақәа зырацәоу - иҳәоит Гиви Смыр. Арҿиаҩы иусумҭақәа рҿы лассы-лассы иқалақь гәакьа Афон ҿыц дазааҭгылоит. «Уи сусумҭақәа ирнымҧшыр ауам, избанзар ҭоурыхла ибеиоу, даҽа қалақьк сара исыздыруам»,- иҳәоит арҿиаҩы. Асахьақәа шәага-загала идузаргьы мызкы-ҩымз рыла аус рыдуланы далгоит, Иҟалалоит аамҭакала ҩ-усумҭак санырҿу – иҳәоит асахьаҭыхыҩ. Иҟоуп аусумҭақәа инагӡаны аус зыдулам, аха ицәыргақәҵоу, ус еиҧш иҟоуп Гәымсҭатәи ацҳа. Ари аусумҭа Гиви игәаанагарала асимволтә ҵакы амоуп. Ацәыргақәҵахь имҩахыҵыз зегьы иазгәарҭон акыраамҭа ирҿиара ишазыҧшыз. «Гиви егьырҭ асахьаҭыхыҩцәа дрылаҩашьом, уи ихатә цәаҩа, ихатә дунеихәаҧшышьа ахьимоу аҟнытә» - азгәарҭоит аҟазара абзиабаҩцәа. Ацәыргақәҵа аартуа Аҧсны акультуреи, аҭоурыхтә культуратә ҭынха ахьчареи рминистр Ельвира Арсалиаҧҳа иазгәалҭеит Гиви Смыр, адгьыл аҵаҟатәи аҧсабара зегь реиҳа издыруа, иусумҭақәа рҿгьы уи ҳәарада ианыҧшуеит. Убри азоуп ибаҩхатәра абри аҟара азҿлымҳара замоугьы. Ииашаҵәҟьаны, ацәыргақәҵа аартрахь имҩахыҵит ахәаҧшыҩцәа маҷымкуа. Уи иахьымӡаз аӡәыр шәыҟазар, февраль ҩажәанӡа ишәымоуп алшара ацәыргақәҵатә зал аҭаара. Альбина Жьиҧҳа Артур Каландиа 10.02.2015