《恭喜八婆》 首條製作花絮片段

由梁詠琪、梁洛施、徐天佑、謝賢、陳靜、林雪、陳奐仁及陳逸寧等主演，彭浩翔執導之首部賀歲片《恭喜八婆》宣傳不斷，今日再釋出從未曝光製作花絮。對於《恭》片被外界一致睇好為「近年最好笑賀歲片」，彭浩翔指新片絕對老幼咸宜：「《恭喜八婆》絕非一部胡鬧賀歲片，其實係透過八個密友嘅矛盾引發出一個又一個嘅驚喜同快樂，笑中有淚，淚中有情。寄語各位朋友新嘅一年無論遇到任何低谷，都要笑住去生活同面對一切。」提到演出陣容龐大，彭導指：「我呢班好朋友其實個個都外表斯文內裡Open，今次終於有機會帶佢地最放最Open嘅一面俾大家睇！」 無異於其他彭浩翔作品，《恭喜八婆》同樣劇情先行，著重角色人物性格，梁詠琪片中角色愛情大過天，為片中前度男友彭浩翔大動肝火。Gigi笑言：「我對導演只能夠話係又愛又恨，每次同佢拍街景佢都話有途人以為金城武同梁詠琪又合作拍戲，對住佢唔知好嬲定好笑。今次呢個女警角色機智冷靜得嚟帶少少躁底，可能導演專登激下我順便幫我入戲！」 另一要角陳靜造型及角色性格卻豪爽衝動又火爆，不少場口均大方展示其最強「胸器」，令人未睇電影先噴血。Dada表示：「導演今次特別設計咗『大波蓮』呢個角色俾我，目標係超越『爆炸糖』，令大家更加難忘同氹到大家開心。好多場面同對白睇落好浮誇，其實都係導演同佢身邊友人嘅真實經歷，相信大家都會喺《恭喜八婆》入面搵到自己嘅特質同生活細節！」人氣網絡平台微辣其中一員豪Dee，獲邀客串演出，更有機會與Dada有肌膚之親，豪Dee表示：「我呢個宅男一直視Dada為女神，第一次親眼見到Dada嘅噴血性感造型，真係大開眼界，全身硬哂，包括眼皮肌肉！」 相反，今次緊密的拍攝過程中，陳奐仁則特別奔波，Hanjin在拍攝期間不停遊走片場和健身室，Hanjin表示：「估唔到今次第一次同彭導合作，已經成為整部電影最性感嘅演員。我片中要赤裸裸去表現而家好流行綑綁，所以拍攝期間都不停加操，加上每日返到屋企行跑步機，希望俾大家睇到最fit身型嘅陳奐仁！」 電影《恭喜八婆》由艾霹克娛樂出品、正在電影攝製及巴福斯影業宣傳及發行。1月31日搶閘賀歲，全港盛大獻映。 更多: https://wmoov.com/movie/details/42742