Хитойдаги ўзбек докторанти: Ваҳимага асос йўқ!

Хитойда коронавируснинг тарқалиши бу мамлакатда ўқиб-ишлаётган ўзбекистонликларни ташвишга солмоқда. Ижтимоий тармоқларда Хитойдаги ўзбекистонликлар ҳимоясиз қолаётгани, дўконларда озиқ-овқат тақчил бўлгани, вирусдан одамлар кетма-кет ўлаётгани ҳақида хабарлар ва видеолар қолдирмоқда. Хитойнинг Чунцин шаҳридаги Жанубий-ғарбий университет докторанти, биолог, ихтиолог генетик 31 яшар Бахтиёр Шералиев Озодлик билан суҳбатда, ўзбекистонлик талабаларнинг ваҳималарида асос йўқ, деди: - Мен Хитойнинг Чунцин шаҳридаман. Бу эпидемия тарқалган Ухан шаҳри жойлашган Хубли провинциясига қўшни шаҳар. Университетда докторантурада ўқийман, мутахассислигим биолог. Молекуляр биология соҳасида илмий фаолият олиб бораман, яъни вирусологияга яқин. Жарён бўйича менда тўлиқ тасаввур бор. Мен ижтимоий тармоқлардаги овозли хабарларни ўқиб ҳайрон қоляпман. Чунки, Уханда ҳам жуда кўп танишларим ўқийди. Улар билан доим алоқадаман. Ҳақиқатда Ухан шаҳрида транспорт қатнови тўхтаган, карантин эълон қилинган. Кучли иммунолог ва вирусологлар ўша ерда. Вазият назоратга олинган.