Къуекъо Налбый - Нэбгыритф (Адыгэхэр)

Къуекъо Налбый Нэбгыритф Мафэ горэм Тхьэм нэбгыритф зэфихьыгъ: зы лIыжъ шIагъу, зы кIалэ зишIугъу, зы шъуз гуахь, зы ныо Iэпс-лъэпс, зы пшъэшъэ дах. Сыхьат горэ зытешIэм нэбгыритфри адыгэу къычIэкIыгъ. ЕтIани зы сыхьэт зытешIэм, лIыжъыр бжъэдыгъоу, кIалэр абдзахэу, ныор шапсыгъэу, пшъашъэр къэбэртаеу, шъузыр кIэмгуе хъугъэх. Джыри зы сыхьат зытешIэм, бжъэдыгъу лIыжъыр мыкъ-мыджы хъугъэ, абдзахэ кIалэр тесый, шапсыгъэ ныор жэмачыу, къэбэртае пшъашъэр мыгъас, кIэмгуе шъузыр тхьацэ. ЕтIани сыхьат тешIагъэти бжъэдыгъу лIыжъыр жакъэ, абдзахэ кIалэр ешъуакIу, шапсыгъэ ныор бзэгухь, къэбэртае пшъашъэр бэ шIагъэу пшъэшъэжьэп, кIэмгуе шъузым егъашIэми лIы иIагъэп. Щэджагъом ехъулIэу абдзахэр нэцэ-Iуцэу, ицые тIоу зэтелъэу, ыгу илъ шъыпкъэр Тхьэми имышIэу аIуагъ. Шапсыгъэр шъугъалэ, бжъэдыгъур гъэблэкIэзыжь, кIэмгуехэр тIого-бзагох, къэбэртаер адыгэбзэ къабзэкIэ къэпIощтмэ «вообще откуда взялсяри», то есть къыздыхэкIыгъэри ашIэжьэп. «Не надо…» - еIо адыгэбзэ къежьэгъакIэкIэ ащыщ горэм. «Ыджы шъузхэхьа хъутэп» - ыIуагъ бжъэдыгъу лIыжъым. «Хъутэп» аIорэп, «хъущтэп» пIон фае», - ыIуагъ кIэмгуем. «Ащыгъум, «хъутми», «хъущтми» тэрэзыр хЫмэ горэм къытерэIу», - ыIуагъ етIани бжъэдыгъум. «ХЫмэп», «хАмэ», - ыIуагъ етIани кIэмгуем.  «ХьаIе горэ тищыIягъ, - къахэгущыIагъ абдзахэр - ХьаIе уиIэмэ, хьаIер бгъэхьэIет, акъыли иIэр ипхыт». ХьэIер къафэкIуи, Iанэм готIысхьи, бжъэдыгъумэ щыпс фашIи, кIэмгуемэ къытырагъэуцуи, абдзэхэ хабзэкIэ щызекIохи, шапсыгъэ джэгу щашIыжьи, бжъэдыгъур лъэпаоу, кIэмгуер елъэщаоу, абдзахэр ебыркъаоу, къэбэртаер етIыркъаоу, шапсыгъэр хьэбаоу зэбгырыкIыжьыгъэх. Джаущтэу а мафэ дэдэм Тхьэм зэрихьылIэгъэ нэбгыритфыр зэхэкIыжьыгъ. Джы Бжъэдыгъу щэтхьэусыхэх, КIэмгуем щэгурымых, Шапсыгъэ щэтхьэуыех, Абдзахэм щэтхыох, Къэбэртаемэ зэрыадыгагъэхэри ашIошIы хъужьэп. ХьаIер машхэ, хьэкIэр мэшхэ, хьакIэм тыдотхъэ, зигъэщхэкIэу тэджыжьымэ, къелыжьырэм тыхагъэIэбэжьынкIи хъун... Youtube video ve altyazı dili olarak Çerkesçe'yi seçmemize izin vermediğinden dolayı akraba dili olan Abhazca'yı seçtim. I selected Abkhazian as the closest relative language because Youtube doesn't allow us to select Circassian as a language of videos and subtitles.