La Galite, un trésor naturel

ستة نكت في البحر الأبيض الواسع من بعيد تراهم.. سبحان ربّي.. زينهم بادع ستة جزر صغار في البحر و زينهم كيما يقولو ناس بكري يعمل القهر galite galiton fouchelles و iles des chiens و يقولولهم بالعربي جزر الكلاب و هوما فوق الأرض يحلّو للجنّة باب أرض مزروعة في ماء صافي يدّي العقل كروم و زواتن تزيد في الخير ثقل تمشيلها من طبرقة و الا من كاب سيراط اتقولش ثنية ملوك و الا بايات في بلاط بلاد مسكونة مالقديم غنية بالأنتيكة زمان الكانالو الراديو و حبيبة مسيكة؟ لا لا زيد أبعد أكثر جزر عظيمة تاريخها أكبر رومان طلاين و فرانسيس عاشو مالبحر الّي بخيراتو يغيص و استقلت من بعد البلاد و تأمّموا الأراضي و كلّ حيّ روّح لبلادو .. هكّة حكم القاضي و بدات الجزيرة تفرغ و عائلة "داركو" تولّي مالماضي أما قعد صيتها طالع و نجمها ضاوي بورقيبة تنفى فيها و في جرح التهجير قعد يداوي جوابات و حكايات تحكي على البلاد الحب و العشقات عامين في جالطة يساويو سنين الخير مرشّق في البرّ و البحر, مرشّق في الأزرق و مرشّق في الخضار كيف بوسة خال على خد نوّار كيف الشمس على البلاد تغرب و اللّيل على سماها يخيم, تظهر نجوم اللّيل و الضباب وراها يضلّل.. يخرج زين موش عادي و من قلب جالطة ينادي.. أنا تونس.. أنا جالطة الجمعية التونسيّة للمتجولين. سبتمبر 2014 http://www.randotunisie.tn/larchipel-de-la-galite-un-tresor-naturel-dans-un-coin-perdu