نركز شوية...التركيز من مفاتيح النجاح

* التركيز.. التركيز.. نركز أكتر في اللي بتعمله..لإن الست لو اتكلمت كتير في التليفون وهي بتطبخ .. حتنساه على النار لغاية ما يتحرق وتقولك .. يوووووه ننسيت.. ما كنتش واخده بالي.. مره في مره.. جوزها حيطفش.. واللي بيسوق العربيه لو اتكلم في التليفون المحمول.. وسرح أواتنرفز في خناقه.. أوووبس.. حادثه.. والتركيز أحد أسباب النجاح.. بل من أحد أهم أسباب النجاح.. ولو مش بتقدر تعمل حاجتين في نفس الوقت ..مش عيب.. اعمل حاجه واحده واكتب التانيه في ورقه.. وبعدين بص في الورقه..واللي بيقول انه ممكن ينسى الورقه أصلا..يبقى مش ناوي يتغير للأحسن..كمان تنفيذ الأمر أو الطلب أو الـمهمـه بسرعه ..عشان نخلص اللي علينا ونتقدم..والتركيز ممكن نعمله تمرين.. يبتدي بإني أحاول إني مانساش .. وده يجي لما تتمرن على إنك تعمل عمليات حسابيه يدوي مش بالآله الحاسبة.. ( ده مش كلامي .. دول أصحابنا اليابانيين) .. حاول تركز.. في اللي بتشوفه .. وإفتكره.. هو انت امبارح كنت لابس قميص لونه إيه..أو هو رئيسك في العمل ..عيد ميلاده إمتى ؟ وكمان تمرين تاني.. اربط كل اسم شخص بتقابله مرات قليله.. اربط اسمه بصورته بموقف أو فيلم أو أغنيه.. أو أي حاجه تفكرك بيه..يعني لو كان على اسم أخوك مثلا.. يبقى ده اللي بيفكرني بأخويا..وده اللي بيفكرني بالممثل الفلاني..وهكذا.. عشان تفتكر اسمه لما تقابله وماتتحرجش.. كمان..هات صورك القديمه واتمرن كل سنه حتى على تذكر الأشخاص الموجوده بالصوره..وهكذا..واللي بيحب الأفلام يحاول دايما يفتكر اسماء الأبطال..وكمان لو قريت كتاب كنت قريته من سنه..وطبعا أحسن كتاب تقراه هو القرآن ويا سلام لو تحفظ سورتين..ممكن تلاقي نفسك بتفتكر صفحات معينه.. وده حيخليك تحسن تركيزك..عشان لسه بدري على الزهايمر..