Президент Ислом Каримовнинг комага тушгани тасдиқланмади

Озодлик радиосининг Оқ саройга яқин манбаалари Ўзбекистон президенти Ислом Каримовнинг комага тушганини тасдиқлашмаяпти. Улар Каримовнинг соппа-соғ эканини айтишмоқда. Сўнгги кунларда Озодлик радиосига шу мазмундаги саволлар билан мурожаат қилувчилар кўпайганди. Мухолифатдаги Ўзбекистон Халқ ҳаракати президент Каримов 28 январь куни кечқурун Кўксарой қароргоҳида кечки овқат пайти гўёки ҳушидан кетгани ва бир кун ҳушсиз ётгани ҳақида хабар тарқатган эди. Расмий Тошкент Каримовнинг комага тушгани ҳақида дунё матбуотида босилаётган хабарларга ҳозирча муносабат билдирмади. - Оқ саройда Каримов қулади, дейишаяпти. Оғриб, касал бўлиб, қулаган экан. Қозоғистондаги телеканаллар, "Euronews" шу ҳақда хабар берди. Газеталар ҳам Каримов қулади, деб хабар бераяптида. Шу ростми? дейди Қозоғистондан қўнғироқ қилган Бек исмли ўзбекистонлик. Ўзбекистонликлар¸ қолаверса хориж нашрларида бундай савол туғилишига мухолифатдаги Ўзбекистон Халқ ҳаракати тарқатган хабар асос бўлган кўринади. ЎХҲ президент Каримов 28 январь куни кечқурун Дўрмондаги Кўксарой қароргоҳида кечки овқат пайти гўёки ҳушидан кетгани ва бир кун ҳушсиз ётгани ҳақида хабар тарқатди.