Россияда машина уриб кетган ўзбек она иши бўйича жиноий иш очилмаганми? - BBC O'zbek

Россияда энага бўлиб ишлаб келган бекободлик 48 ёшли Мавжуда Эгамқулованинг айтишича, 22 май куни пиёдалар йўлагидан ўтаётиб уни машина уриб кетган. У "Тез ёрдам" билан Москва шаҳридаги 67-касалхонага элтилиши ортидан уч кун реанимацияда ётган, сўнгра травматология бўлимига ўтказилган. Шифокорларнинг айтишича, унга зарур жарроҳлик амалиёти 400 минг рубль (7 минг доллар)га тушиши мумкин. "Эгамқулованинг тиббий суғурта хужжати йўқ. Тиббий полисга эга бўлмаган беморлар эса белгиланган тартибда шифохона хизматлари учун ҳақ тўлайдилар. Уни зудлик билан операция қилиш зарур. Бу ерда имконияти бўлмаса, ватанига бориб жарроҳлик амалиётини олсин. Тошкентда ҳам тиббиёт ривожланган. Беморни ўз юртига олиб кетганлари маъқул, самолётда кетишига рухсат берувчи барча хужжатларни тайёрлаб берамиз", - дея изоҳ берди даволовчи шифокор Олег Черемухин. Мавжуда Эгамқуловага бош мия чайқалиши, бош ва юз тўқималари жароҳатланиши, кўкрак қафаси ёпиқ жароҳати, чап елка, 2-3 умуртқалар ёпиқ синиши, чап тос-сон, чап тизза ва болдир ёпиқ синиши каби ташхислар қўйилган. Унинг уриб кетилиши борасида жиноий иш очилгани ё очилмагани номаълум. Шу вақтгача беморнинг олдига ҳуқуқ-тартибот органларидан ҳеч ким келмаган. Би-би-си бу борада Москванинг Хорошево-Мневники тумани, Северо-Западный маъмурий округи ГИБДДси билан боғланди. Ўзини таништиришни истамаган навбатчи идорага келиб мурожаат қилишни тавсия қилди. Би-би-си Ўзбек хизматининг видеоларини www.bbcuzbek.com да ҳам кўришингиз мумкин.